“Она бўлганингда тушунасан...” Ҳар гал гапингизга кирмаган пайтим шундай дердингиз.
Минг шукр, менга ҳам оналик бахти насиб этди. Қанчалар ҳақ эканингизни, айтганингиздай, она бўлгач, тушундим. Набираларингиз катта бўлгани сари, оналик масъулиятим билан бирга сизга ҳурматим ҳам ортиб бормоқда. Энди ўзим ҳам тез-тез: “Она бўлгач тушунасизлар”, дерканман, тобора сизга ўхшаб бораётганимни ҳис қиламан.
Аслида, мени мен қилган хусусиятлар, ҳаётга кўникмалар пойдеворини сиз қўйгансиз. Бугун ҳеч оғринмай ҳар кунги иш каби бажарган, ҳатто ёдингиздан ҳам кўтарилган, аммо менга жуда аҳамиятли бўлган нарсалар учун сизга ташаккур айтмоқчиман. Гўдаклигимда мен билан бирга бола бўлиб, столлар остига, шкаф ичига киришдан малолланмай, беркинмачоқ ўйнаганингиз учун раҳмат. Энди мактабга чиққанимда қўлим ёзувга келишмай, аламдан тўкаётган кўзёшларимни артиб, сабр-қаноат билан дарсларимни тайёрлатганингиз учун раҳмат. Кундалигимни акамникига қиёслаб, менга ҳар доим рағбат берганингиз учун раҳмат. Яхши кўрган қўғирчоғимга тикиб берган жажжи кўйлакчаларингиз учун раҳмат.
Ўн бир ёшимда биринчи марта овқат қилганимда, шўр бўлганини айтмай, жуда ширин чиқибди, дея алқаб-алқаб еганингиз, кейин ҳам овқатларим устидан шикоят қилмаганингиз учун раҳмат.
Катта бувимдан мерос, сиз учун жуда қадрли идишнинг қопқоғини синдириб қўйганим, койимасдан, тўғрисўзлигимни мақтаганингиз учун раҳмат.
Ҳовлидаги товуқ, жўжа, қуёнларга бирга дон, емиш бериб, қувониб-қувонтириб, ҳайвонларга кўнглимизда шафқат уйғотганингиз учун раҳмат.
Қиш кунлари қалин қор ёққанида қор ўйнаб, совуқдан қизариб кетган қўлчаларимизни нафасингиз тафти билан иситганингиз учун раҳмат.
Укамга кўк кийим сотиб олиб, қизили, каттароғидан менга ҳам олиб келганингиз, эътиборингиздан четда қолдирмаганингиз учун раҳмат;
Баъзан нимадандир нолиб, кўнглимни чўктирган пайтларимда насиҳат қилиб, неъматлар берган Аллоҳ таолога шукр айтишга ўргатганингиз учун раҳмат.
Менга худди сиздек она бўлишни ўргатганингиз учун раҳмат.
Хизматларингизни ёзиб, бир-икки саҳифага сиғдириб бўлмайди. Сиз қилган ва қилаётган фидокорликларга ҳамон гувоҳман. Ҳаммаси учун сиздан миннатдорман, онажон!
Дилдора БОБОМУРОД қизи тайёрлади