Muslima.Uz

Никоҳ узуги...

Подробности

Бўлим: Иллат

Келин-куёв никоҳ вақтида бир-бирларининг қўлларига узук тақиш одатини халқимиз ўрислардан ўрганган. Бунинг христианликка алоқаси борми? Нима учун узук айнан тўртинчи бармоққа тақилади?

Жавоб: Шариатимиз эркакларга тилла тақинчоқларни ҳаром қилган. Бу нарса аслида христианларнинг учхудолик эътиқодига бориб тақалади. Лондонда чоп этиладиган «WOMAN» («Аёл») номли журналнинг 1960 йил 19 март сони, 8-саҳифасида ушбу савол-жавоб чоп этилган:

— Why is wedding ring placed on the third finger of the left hand?

Нима учун никоҳ узуги чап қўлнинг тўртинчи бармоғига тақилади, деган саволга журналнинг савол-жавоблар бўлими муҳаррираси Анжела Талбот шундай жавоб беради: -

— There is the ancient origin whereby the bridegroom placed the ring on the tip of bride's left thumb, saying: «In the name of the father* on the first finger, saying: «In the name of the son» on the second finger, saying: «And of the Holy Ghost», on the word «Amen», the ring was finally placed on the third finger where it remained.

— Бу удум қадимий одатларимизга бориб тақалади. Аслида қоидаси бундай: куёв узукни келиннинг бош бармоғига қўйиб: «Ота номи билан» дейди. Сўнгра кўрсаткич бармоғига қўйиб: «Ўғил номи билан», дейди. Сўнг учинчи бармоққа қўйиб: «Муқаддас Руҳ номи билан», дейди ва охирида «Амин» деб тўртинчи бармоғига тақиб қўяди».
Бу эътирофдан келиб чиқадики, «никоҳ узуги» ҳам, уни келин-куёв бир-бирига тақиб, қўйишию кейин тақиб юришлари ҳам диёримизга совет замонида кириб келган, аслида христианларнинг диний маросимларидан бири бўлган бегона одатдир. Афсуски, биз ҳар жиҳатда шон-шарафларга бурканган мусулмон аждодларимизнинг бугунги болалари нима ўзимизники, нима бегоналигини фарқлаёлмай қолдик.

Манба: "Ҳидоят" журнали 2002 10 сонидан

Хориждаги тўйлар

Подробности

Бўлим: Иллат

Тўй халқимизнинг энг эътиборли, муҳим удумларидан. Айниқса никоҳ тўйлари ҳар бир ўзбек оиласи ҳаётида чуқур из қолдирадиган шодиёна ва хурсандчилик маросимидир. Аммо кейинги пайтларда никоҳ тўйларини ўтказишда йўл қўйилаётган дабдабабозлик, кимўзарга ортиқча харажат сарфлашлар, шариат кўрсатмаларида бўлмаган янгича маросимларни жорий қилиш каби кўнгилсиз ҳолатлар ҳаммани баравар ранжитмоқда, ўйлатмоқда, мунозарага чорламоқда. Бу борада изланишлар олиб бораётиб, турли замон ва турли халқларнинг никоҳ тўйларига муносабати ҳақидаги тажрибалар билан ўртоқлашгим келди.
Камина уч марта, жами юз эллик беш кун мобайнида Саудия Арабистонида илмий сафарда бўлдим. Ўз-ўзидан равшанки, шу муҳлат ичида «бухорийлар»нинг (юртимиздан у ерга бориб қолган ҳаммани шу ном билан аташади) кўплаб урф-одатларини ўрганиш, бир неча тўйларида иштирок этишга тўғри келди. Саудиялик ватандошларимизнинг тўйлари бизникидан унча фарқ қилмайди. Уларда ҳам тўйлар асосан махсус тўйхоналарда (уларни «қаср» дейишади) ўтади, тўй зиёфатига чиройли чоп этилган махсус таклифнома билан чораланади. Лекин тўйга келганлар биздагидай стол-стулларда эмас, катта залга айланасига қўйилган юмшоқ ўриндиқларда (креслоларда) жойлашишади. Зиёфат аксари ҳолларда шом намозидан сўнг бошланиб, тунги соат бир-иккиларда тугайди.
Меҳмонлар келиши билан ҳар тўрт-беш киши олдидаги махсус хонтахталарга идишларда олий навли хурмо ва ширинлик қўйилади, бойроқ кишилар тўйида хурмо данагини олиб, ўрнига бодом мағзи тиқиб қўйишади. Башанг кийинган ёш хизматчи йигитчалар меҳмонларга арабча қаҳва ёки чой улашиб туришади. Ҳамма ширинлик билан чой ё қаҳвасини ичиб, ширин суҳбат қуриб ўтиради, бошқа шаҳарлардан келган қадрдонлар билан ҳол-аҳвол сўрашилади. Қиз узатиш тўйи бўлса, қадрли меҳмонларга ҳадячалар улашилади. Қаср ташқарисидаги ҳовлида эса куёвнинг дўстлари учун кенг ялангликка гилам тўшаб, алоҳида жой тайёрланади. Улар ҳам шу ерда суҳбатлашиб ўтиришади, аммо дастурхон тузалмайди. Бундай суҳбатлар кеч соат ўн бирларгача давом этади.
Шундан кейин тўй зиёфати бошланади. Меҳмонлар ўриндиқлардан гиламга тушиб, тўрт кишидан ўтиришади. Хизматчилар ўн дақиқа ичида улар олдига елим дастурхон (уларда «суфра) ёзишади, унга озроқ нон, яхна ичимлик ё шарбатлар, олма, пўртахол, банан каби бир-икки хил ҳўл мева қўйиб чиқишади. Сўнгра ҳар тўпга биттадан катта товоқда ош тортилади. У билан баравар бир марта ишлатиладиган елим қошиқ ва тиш кавлагичлар ҳам улашилади. Куёвжўраларга ҳам дастурхон тузалиб, Ош тарқатилади. Ош еб бўлингач, ҳамма яна ўриндиқларга қайтиб, чой ё қаҳва устида суҳбатни давом эттиради. Хизматчилар дарров «суфра»ларни йиғиштириб олишади, ортиб қолган таомлар эса 999 рақамига қўнғироқ қилиниб, хайрия ташкилотларига муҳтожлар учун бериб юборилади. Тунги соат бирда одамлар рухсат ҳам кутмай, ҳовлидаги тўй эгаси билан хайр-хўшлашиб уйига жўнайди. Аксарият ватандошларимизнинг тўйлари худди шу тарзда ўтади. Тўйларда мусиқа чалиш, ашула айтиш, рақсга тушиш одати йўқ.
Мартабаси улуғ, бадавлат, хос кишиларнинг тўйлари сал ўзгачароқ ўтади: уларда меҳмонлар биздагига ўхшаб атрофига саккизтадан юмшоқ курси қўйилган айлана столларда атрофида ўтиришади. Улар ҳам чой ёки қаҳва устида суҳбатлашиб ўтиришади. Соат ўн бирларда эса ҳамма  «шведча стол» тартибида зиёфатга туради. Яъни, қўлига идиш олиб,  қўшни хонада катта идишларда сузиб қўйилган бир неча хил таомлардан хохлаганини ва егулигини идишига солади ва столига келтириб ейди. Иссиқ овқатлар бир-икки хил суюқ, палов, пиширилган гўшт, манти ва араб миллий таомларидан иборат бўлади. Овқатни еб бўлингач, идишини махсус жойга элтиб, кейин газагига музқаймоқ ейилади.
Бир сафар Тоиф шаҳрида афғонистонлик ўзбеклар тўйида ҳам иштирок этдим. Улар одатига кўра, катта хоналарга узунасига Қашқадарё ёки Сурхондарёдаги каби кўрпачалар солиниб, ўртага дастурхон тузалади. Уларда мева-чева кам тортилади, аммо иссиқ овқат кўп улашилади.
Саудиядаги ватандошларимиз тўйи нимаси биландир тарихий томиридан узилганга ўхшайди: тўй бору томоша, хурсандчилик йўқ, тўйларнинг ўйин-кулги қисмидан воз кечилгандек… Лекин Жиддада яшайдиган Абдуллажон Туркистоний деган ватандошимиз қиз узатганида тўй ўйин-кулги билан ўтди: ўзбекистонлик умрачилар орасида Аҳмаджон Дадаев исмли санъаткор борлигини эшитиб, уни тўйга таклиф этишди. У тор билан чиройли ашулалар ижро этди. Тўйга келганлар юракдан ўйнашди, буни тасвирга ҳам туширишди. Меҳмонлардан бирининг айтишича, «занг босган юракларини бир тозалаб олишди».
Агар биздаги гоҳо бўлиб турадиган ўринсиз исрофгарчиликлар, кимўзарга ҳаддан ошишлар, дабдабабозликларни истисно қилганда, тўйларимизни ҳақиқий хурсандчилик намунаси, деса бўлади. Аммо ватандошлар тўйининг бир томони ибратлики, уларда одамлар тўйга фақат қорин тўйдиришга эмас, асосан дийдорлашгани, чиройли суҳбат қургани келишади. Кейин уларда қизнинг сепи ҳам рисоладагидай: фақат керакли рўзғор ашёлари, асосан мебел қилинади. Аммо шариат талабига кўра келиннинг маҳрини беришга алоҳида эътибор қаратилади.
Шу ўринда неча асрлардан буён инсонларга ибрат бўлиб келаётган яна бир тўй ҳақида тўхталиб ўтмоқчи эдим. Маълумки, Пайғамбаримиз Муҳаммад (алайҳиссалом) суюмли қизлари Фотимаи Заҳрони жиянлари Ҳазрати Алига (каррамаллоҳу важҳаҳу) узатмоқчи бўлдилар. Лекин Ҳазрати Алининг тўй қилишга пуллари йўқ. Заргарликда керак бўладиган «изхир ўти» териб келиб, бир заргарга сотдилар, лекин бу ҳам урвоқ бўлмади. Шунда маслаҳат сўраб, Расулуллоҳга (соллаллоҳу алайҳи ва саллам) учрадилар. «Сотишга ниманг бор?» деб сўрадилар Фахри коинот. «Совутим», деди Ҳазрати Али. Тўй харажати учун совутни Ҳазрати Усмонга тўрт юз саксон дирҳамга сотишди. Лекин Ҳазрати Усмон ҳам олийҳимматлиликнинг чўққисида қолди: йигит киши қуролсиз қолмасин, дея совутини Ҳазрати Алининг ўзига ҳадя қилди. Тўй  зиёфати ҳам камтарона бўлди. Ансорлардан бири совға қилиб келтирган қўйни сўйиб, таом тайёрлашди. Пайғамбар алайҳиссалом юборган хурмо ва зайтун ёғи дастурхонга тортилди. Ҳазрати Алининг келинга берган маҳрини қаранг: иккита кўйлак, бир пўстак, бир қўл тегирмони, бир ёстиқ, бир мешкоб ва бошқа рўзғор ашёлари… Бу мусулмонлар йўлбошчисининг севимли қизига улуғ саҳобийнинг қилган сепи ва тўй харажатлари эди.
Алҳамдулиллаҳ, тўқчилик замонида, ҳамма нарса сероб бўлган жаннатмакон юртда яшаймиз. Аммо бу тўйларимиздаги исрофгарчиликни оқлашга, дабдабабозликка йўл очишга, ортиқча маросимлар ўтказишда кимўзарга беллашишга баҳона бўлмаслиги керак. Ҳамма анрсанинг исрофи бор, исрофгарлар эса жаннатга киришмайди. Тўйларимизда азалий андозаларимизга риоя қилайлик, қуюшқондан чиқиб кетмайлик.

Сайфиддин ЖАЛИЛОВ,
профессор, Андижон

Уриш ёки урмаслик?

Подробности

Бўлим: Иллат

Ислом аёлларга жисмоний жазо бериш ҳақида нима дейди? Тарбияда асосий мезон муҳаббат ва ҳурмат деб айтадиган Қуръони каримда бу ҳақда нима дейилган?

Тирик кўмилган қизалоқ ...

Подробности

Бўлим: Иллат

Дунё Тижорат Марказидан буюмлар сотиб олдим. Юким оғир бўлгани учун хитойлик сотувчини чақирдим ва у: Ҳаммол чақирайми?,– деди. Мен: Ҳа,– деб жавоб бердим.
У дўконидан чиқиб, ўзи билан бирга йигирма ёшдан ўтмаган навқирон қизни етаклаб келди. Мен: Ҳаммол қаерда?,– деб сўрасам: Мана ҳаммол!,– деб жавоб берди!!
Мен бу ишдан норози бўлиб, эркак ҳаммолни талаб қилдим. Бироқ, сотувчи кўнглимдаги ҳайрат ва нафратни ҳис эгандек: Бу ёққа кел ва кўр!,– деди. У гўё: Хоҳлаганингни ўзинг танлаб ол!,– дегандек юк араваси ёнида туриб ҳаммоллик қилаётган ва юки бўлган одамларга юкларини ташиш учун бақираётган бир тўп қизни кўрсатди.
Мен бу манзарага чидай олмадим ва менга ҳаммоллик хизматини таклиф этган хотин–қизлардан айрилиб, эркак ҳаммолни қидира бошладим...
Менинг бу ҳаракатим хотин–қизларни камситиш учун эмас эди. Мен юкларимни ёш қизчага кўтаргизиб, олдида кетишдан уялдим. Мурувватим, ярим яланғоч қийинган қиз билан машинамнинг олдигача бирга юришимга монеълик қилди. Ғурурим эса Аллоҳ таоло мукаррам қилиб қадрини кўтарган ва ҳатто суралардан бирининг номини уларнинг номи билан атаган хотин–қизлар қадрини камситишда жоҳил инсонларга ўртоқ бўлишдан бош тортди...
Жоҳилият замонида ҳали ақли тўлмаган, кучи ва қуввати бўлмаган қизалоқларни уят ва рашк юзасидан ўлдиришар эди. Ҳозир эса  ақлу ҳуши жойида, қачон, қандай, қаерда ва нега «дафн этилиши»ни тўкис тушуниб турган ёш қиз ва жувонларни кечаю кундуз, сиру ошкора тириклай кўмилмоқда. Ҳа, қиз ва жувонларнинг ўз хоҳишлари, ақлий ва жисмоний қувватлари билан кўмилмоқда! Ҳатто, бу «дафн»да қиз ҳам ўз розилиги билан қатнашмоқда ва кўпроқ тупроқ тортишлари учун курашмоқда!
Улар аёлларни бегона эркаклар қучоғига кўмишмоқда. Эркаклар ўз навбатида қиз ва жувонларни «ҳуррият» ва «тенглик» шиори остида ўйинчоққа айлантириб, аёллик назокатига тўғри келмайдиган иш ва вазифалар билан кўчанинг чорраҳасига отмоқдалар. Аёл «ўзига бўлган ишонч»га суяниб, ҳимоя қиладиган оиладан маҳрум бўлиб, кўчаларда тентираб юрмоқда. Жоҳиллар аёлни қорнида кўтариб юрган ҳомиласи билан, бағрида кўтариб юрган фарзанди ёки саводини чиқариши учун бошланғич мактабга кўтариб кетаётган сумкаси орасига кўммадиларми?!! Ҳа, кўмдилар! Кошки уни кийимлари ва тўсилган аврати билан кўмишсалар эди!! Бу «митти қизалоқ» «кўмилаётганида» мода, тараққиёт, маданият ва кучли дид соҳибаси деган ном билан унинг авратларини очдилар, кийимларини ечдилар ...

Аёлнинг ўзи ҳам таҳқирлашлари ва сотиладиган ва харид қилинадиган матога айланишида жоҳилларга ёрдамчи бўлди...
Ҳа, ўз қадрини камситиш ва таҳқирлашда аёлнинг ўзи ҳам ёрдамчи бўлди! У, ўзини иккинчи марта тирик кўмишлари ва дафн этишлари учун яшил чироқни ёқди...
Эркак ҳаммолни қидирар экан бозорнинг бошқа томонида бошларига рўмол ўраган, ёнларида кўпгина сумкачалардаги юкларни кўтариб олган эркак билан кетаётган учта аёлга кўзим тушди. Эркак улар тўхтаган жойда тўхтар, юрсалар юрар эди. Улар бирон нарсани харид қилишса, эркак пул узатар эди... Улар гўё маликалар эди... Ҳа, улар мукаррама, иболи ва ғурурли маликалар эди. Имом Бухорий раҳимаҳуллоҳ тобиинлардан бири бўлган Асвад раҳимаҳуллоҳнинг ушбу ривоятини нақл қилади: «Оиша разияллоҳу анҳодан Расулуллоҳ соллаллоҳу алайҳи ва салламнинг уй ичида нима ишлар қилгани ҳақида савол берилганида: «Рафиқаларига ёрдам берар ва вақти келгач намозга чиқиб кетар эди»– деб жавоб берди» (Имом Бухорий 676).
Мусулмон эркак мана шундай бўлади. У, аёлларнинг онаси, опаси, синглиси ёки рафиқаси бўлишларидан қатъий назар ҳуқуқларини ортиғи билан беради. Уларга уй ичида ёрдам бериш билан чекланмай, имконида бўлган нарсасини ва ҳатто уларни ҳимоя қилар экан жонини ҳам фидо этишга шай туради!
Ўзларининг юк аравалари билан кўчаларда ўтириб, бир ёки икки доллар ёхуд бир ёки икки сўмни кутаётган мазкур қиз–жувонларнинг анави «маликалар»га ҳасад кўзи билан қарашлари, кўнгилларидан: «Шу хорловчи меҳнат ўрнига анави ўранган жувонлар ўрнида биз бўлсайдик!» дея умид қилишлари, шубҳасиздир. Лекин, ўрталарида анчагина фарқ бор!

Ҳикоядан бир оз чекиниб, бошқа куни бўлиб ўтган ҳодисани эсладим. Машинамда ошхонага берган буюртмам пишишини кутар эканман, ичкарида ўтирган ғарблик эркак ва аёлга кўзим тушди. Улар овқатланиб бўлгач ўринларидан турдилар ва кассирга эркак ва аёл айри пул тўладилар. Ҳа, эркак ўзи еган таоми учун, аёл эса ўзи еган таоми учун алоҳида пул тўлади ва машинага бирга ўтириб, йўлларига равона бўлишди!!

Эй алданган синглим, наҳотки энг қийматли нарсани сариқ чақага ҳам арзимайдиган нарсага алиштирсангиз?!

«Алдамчи ҳуррият ва тенглик»нинг сохта ялтироқларига алданган айрим қиз ва жувонларимиз «ғарбона ва шарқона» қийматларни олиб келиб, «ғарбий ва америкача намуналар» бозорини жамиятимизда қизитиб, кечаю кундуз ушбу сохта ҳуррият ва пасткаш маданият талабида ҳайқирмоқдалар. Ҳатто уларнинг айримлари «Хотин–қизларни озод қилиш» ва «Эркаклар билан тенглик» ҳаракатларининг чақириқлари ортидан чопиб, аёлнинг ҳаётидаги эркакнинг ўрнини бекор қилиш ҳамда ҳаёт ва ҳаёт қонунларини бутунлай феминизмга айлантиришга чақирмоқдалар!!
Сиз уларнинг гапларини эшитиб, мақолаларини ўқисангиз араб (ўзбек) аёли ва муслималарнинг «аянчли» воқеъларини бўрттириб кўрсатаётганларига гувоҳ бўласиз. Аслида эса бу салбий кўринишлар жамият ҳаётидан исломий қадриятларни четлатиш, Исломни тўғри татбиқ қилмаслик бўлиб, бунинг акси эмасдир!!

Эрнинг рафиқасига зулм қилиши, уни хорлаб, хўрлаши, калтаклаши ва ҳуқуқларини поймол қилиши шариат андозаларига зид бўлиб, зулмга қарши оғиз очмаслик аёлларнинг ўз ҳуқуқларини билмасликлари, ҳайвонга ҳам инсоф қиладиган шаръий аҳкомларни жорий қилишда ижро, низом ва муассасаларнинг мавжуд эмаслигидир!

Шу ерда муҳим саол туғилади: Хотин–қизларни озод қилиш ҳаракати аёлга интилган саодатини бердими ёки бахтиқаролигини зиёда қилдими? Бу саволга жавоб бериш учун эътиборингизга бутун дунёга «ҳуррият»ни экспорт қилаётган ва Афғонистон ва Ироқда ҳарбий устунликни қўлга киритганидан сўнгра: «Ижтимоий ва оилавий ҳаётнинг марказига кирган омилларга мувофиқ, муслималар оламидаги зулмни илдизи билан қуритиш замони келди!» дея жар солаётган Америка Қўшма Штатларидаги хотин–қизларнинг воқеий ҳаётларидан олинган айрим ҳақиқатларни ҳавола этмоқчиман! Бу ҳақиқатларни тадқиқотчи олима Нура Саъд синглимиз тўплаган. У шундай дейди:

Америкалик хотин–қизлар веқеълиги, «Америкача Бошқарув дурдонаси» даъво қилаётган адолат ва хавфсизликни аёл кишига бера олмаганига шоҳиддир. Биз буни ўша воқеъликнинг ҳисоботи ўлароқ таржима қилинган ушбу сатрларда ўқишимиз мумкин:

– 13 миллион америкалик ҳар куни марихуана, 8 миллион америкалик наркотик таблеткалар, 4 миллион америкалик эса кокаин истеъмол қилади. 50 миллиондан ошиқ америкалик эса ароқ ичишга муккасидан кетган пиёнистадир!!
–  7 америкаликдан бири яъни 39.4 миллион америкалик жинсий мақсадлардаги бевосита ҳужумларга ёки шилқимликка дуч келган.
–  7 америкаликдан бирига болалик чоғида тан жароҳати етказилган.
–  42 % америкалик эҳтиросли ва шафқатсиз жинсий тажовузларга дуч келганига эътироф этган.
–  50 % америкалик эр ва хотин ўртасидаги алоқаларни никоҳсиз тенглик ҳаёти деб тушунади. 50 % америкаликлар эса оила қуришга умуман эҳтиёж йўқ эканини таъкидлайди.
–  Америкадаги ёшлар ўртасида ўз жонига суиқасд қилиш ҳодисалари Европадаги ёшларга қараганда 20 баравар, Япониядагиларга қараганда ўттиз неча баравар кўпдир. АҚШда бир йилда 30 минг киши ўз жонига суиқасд қилган.
–  25 миллион америкалик герпес касаллигига чалинган. Америкалик ёшлар ва қизларнинг чорак қисми шу касаллик билан оғрийди. 1 миллион америкалик эса ОИТС (СПИД) касаллигига чалинган ва ўзларининг ОИТС вирусини дўстларига «ташувчи» эканликларини уялмай айтаверадилар!
–  Америкалик хотин–қизларнинг 80 фойизи кейинги 30 йил мобайнида америкалик хотин–қизлар қўлга киритган ҳуқуқларга ахлоқий бузуқлик ва шиддат натижасида эришилганига иқрор бўлган. Улардан 75 фойизи қадриятларнинг емирилиши ва оиланинг бузилиши туфайли қайғуларини тилга олган.
–  Америкалик хотин–қизларнинг 80 фойизи ўзларининг ишдаги масъулиятлари билан, умр йўлдошлари ва болалари олдидаги мажбуриятларини мувозанатлаштиришда катта қийинчиликларга дуч келаётганини тан олган.
–  Америкалик хотин–қизларнинг 87 фойизи ҳаёт гардишини орқага қайтириш имкони бўлса, эркаклар билан тенглик ҳуқуқини талаб қилишни Америка Қўшма Штатлари давлати учун катта фитна ҳисоблаб, бу шиорни кўтариб чиққанларга қарши курашиш ўзининг бурчи эканини таъкидлаган.
–   1994 йилги ҳисоботга қараганда америкалик эркакларнинг 79 % рафиқаларини калтаклайдилар.
–   Америкалик хотин–қизларнинг 18 % (17.7 миллиони) зўравонлик қурбонидир ва уларнинг ярмидан кўпи 17 ёшга тўлмай қурбон бўлган!
–  «Хотин–қизларга нисбатан зўравонлик хуружларига қарши курашиш» жамиятининг ҳисоботига қараганда 35 ҳолатдан бир ҳолатдагина хотин–қизлар босқинчилик хуружидан шикоят қиладилар.
–  Америкалик хотин–қизларнинг 42 фойизи иш жойларида, таълим муассасаларида, клуб ва кўчаларда жинсий шилқимлик қурбони бўлганллар. Моника Левинский бунинг ёрқин намунасидир! 
–  Америкада 6 миллион хотин уйида эридан калтак ейди ва на полицияга ва на касалхонага мурожаат этиб шикоят қилади. Зеро (Америка Давлат Оилани Мувофиқлаштириш Муассасаси координатори Джонис Мур тайёрлаган ҳисоботга кўра) 10 минглаб жувонлар кўз атрофидаги кўкаришлар, синган суяклар, ёнган ёки жароҳатланган, пичоқ билан кесилган, ўқ еган ёхуд стуллар теккан ёда қиздирилган насалар билан куйдирилган аъзоларини даволатиш учун муоянахоналарга келадилар.
–  Нью Йоркдаги Бирлашган Миллатлар Ташкилоти Қароргоҳига яқин жойдаги боғларда бир куннинг кундузида 24 хотинга тажовуз қилинган.
–  Бундан бир неча йил илгари Америка CNN радио канали тарафидан тарқатилган хабарларга кўра, йилига 2 миллионга яқин жувон ва вояга етмаган қизчалар фоҳишахона ва қовоқхоналарда ишлатиш учун сотилади. Улар Шарқий Европа – Россия ва унга қўшни бўлган камбағал ўлкалардан Америкага келишади.
–  Америкада бир ярим миллиондан ортиқ хотин–қиз фоҳишаликни тирикчилик манбаи қилиб олган!!

Бу – америкалик жувон ва унинг фарзандлари баҳраманд бўлаётган фаровонлик, хавфсизлик ва омонликнинг инсоний харитасидир!!

Албатта, биз Америкада бундай иллатларга қарши бел боғлаб курашаётган ва ислоҳот йўлларини қидираётган талайгина хотин–қизлар муассасаси борлигини биламиз. Бироқ, қуйидаги саволларга жавоб топишимиз керак:

Қийматлардан айрилиш ва табиий истакларга мутлақ имконият бериш ҳуррияти, тақлид қилиш учун бошқа жамиятларга намуна бўлиши мумкинми?!

Тараққиёт танани яланғоч қилиш... билан юзага келадими?!

Муаллиф: Карам Сафар Муборак
Мутаржим: Абу Жаъфар ал–Бухорий